لە وتارێکی دا بۆ وێبسایتی کۆین دێسک، دامەزرێنەری کوردکۆین باسی کریپتۆ دەکات لە عێراق

لە وتارێکی ڕای تایبەتدا کە لەلایەن کۆین دێسک بڵاوکراوەتەوە، عەبدولڕەحمان باپیر، دامەزرێنەری کوردکۆین، تیشک دەخاتە سەر بڵاوبوونەوەی بێوەستانی کریپتۆ لە عێراق و هەرێمی کوردستان، تەنانەت کاتێک دەسەڵاتداران هەڵوێستێکی توندیان بەرامبەری هەیە.

“کاتێک کوردکۆینمان لە ساڵی ٢٠١٧ دامەزراند، تەنها چەند سەد کەس لە عێراق ناوی کریپتۆیان بیستبوو. ئەمڕۆ، کۆمەڵگاکە گەشەی کردووە بۆ هەزاران کەس،” باپیر لەوتارەکەیدا نووسیویەتی.

ئەو ڕوونی دەکاتەوە کە دانیشتوانی گەنجی عێراق کە شارەزای تەکنەلۆژیان و زۆربەیان حسابی بانکییان نییە، کریپتۆ وەک ڕێگایەکی جێگرەوە بۆ هەڵگرتنی بەها و وەبەرهێنان و پارە ناردن و وەرگرتن قبوڵ دەکەن. دواتر دەڵێت کە بە زیاتر لە ٣٧ ملیۆن ئامێری مۆبایل و بەکارهێنانی ئینتەرنێت کە لە ٧٥٪ زیاترە، ژینگەی عێراق گونجاوە بۆ بەکارهێنانی دراوی دیجیتاڵی.

بەڵام، باپیر هۆشداری دەدات کە نەبوونی ڕێکخستن ڕەشەبازاڕێکی پڕ لە فرتوفێڵ و ساختەکاری دروست کردووە. ئەو بەڵگە دەهێنێتەوە کە قەدەغەکردنی کریپتۆ کێشەکان ناوەستێنێت – تەنها خراپتری دەکات. “تەنها ڕێگا بۆ چارەسەری ئەم کێشەیە، پێشکەشکردنی پڕۆژە یاسایەکە بۆ ڕێکخستنی دراوە دیجیتاڵییەکان،” ئەو دەنووسێت.

سەرەڕای قەدەغەکردن و ئاگادارکردنەوەکانی حکومەت، هەزاران هاوڵاتی عێراقی بەردەوامن لە بەکارهێنانی کریپتۆ بە شێوەیەکی ڕۆژانە. وەک باپیر لە کۆتایی وتارەکەیدا ئاماژەی پێدەدات، “بەکارهێنانی بەرفراوانی کریپتۆ لە عێراقدا شتێکی حەتمییە، ئەمەش بەهۆی ئەو دەرفەتە داراییانەی کە کریپتۆ دەیانڕەخسێنێ لەگەڵ ئاسانی بەکارهێنان کە بۆتە هۆی زیادبوونی خواستی بەردەوام لەسەر دراوی دیجیتاڵی.”

بۆ خوێندنەوەی تەواوی وتارەکە بە زمانی ئینگلیزی سەردانی وێبسایتی کۆیندێسک بکە.